گمرية البسمه


سولفتلک ریش فارگ جنحه من اول امس ..

وسولفتلک نجمه ضیعها الضوه ابحضن الشمس ..

وسولفتلک جرح گاعد یحچي لچماته ابهمس..

و سولفتلک عن شذاک الخربص افکار الحدایق ..

الکسّر ابمشیه شبابیچ السوالف...

النگّط ابحلگ الصبح بستان یضحک..

یا غمگ لیلي امن اذکرک ..

و یا متاهت عینک الخاوت اظنوني وتیهت سنبل اسنیني اینام خدران اعلی جمرک..

وعي گمرية البسمه وخل اضوگ الفجر مره ..

خل امر ابدرب شمسک..

خلني اشرب ضوه واسکر ..

خل ادوخ ابوجه صیفک ..یا سموم الشوگ موتني اعلی کیفک..

ردلي ظلي الچلّب ابشباچ ظلک ..

ردلي طفلة عمري ذیچ الضیعتها ابسالفة ((مشتاگ خلّک))..

سولفتلک کثر الله ومالگیتک .. وخضّرت(( لیش)) اعلی طولي وغنّت ادموعي ابعبیرک من بچیتک ..

اتکسّرت عبرة الصوره وانته مامش ..

انته مامش .. الصوره واصل صوتها الاخر صفنتي وانته مامش ..

یاکبر خلگ الستایر..

یا وسع صدر المخده البیها ظل یمشي حلم مکسور خاطر..

وبیها ظل آثار من دمعات شاعر..

سید حسن الشریفي


 سيد حسن الشريفي
 

جربة شیب

جربة شیب طشوها اعلی راسی وبللو عمري ..

مشو و اعیوني طاحن یم سواحلهم صدف مسحوگ..

بعید اشراعهم والموج ینسل چم جرف مخنوگ..

بعید النور ....

والظلمه بلم مکسور..

خذو ثلثین من طیني و جزو عني ..

امد صوتي جسر مهدوم بلکت تعبر اسنيني و تلاحگهم..

هدم جرحي یضم بیه جسم متعوب ..

یمر وني قوافل غیم وایغرگ ثلاثیني ابدثیث افراگ ..

وارجع من جدید اشتاگ..

واجروحي تبدل اثیاب..

ارجع من جدید اعیون مابیهن ملامح شاب..

یدرب العافیه اشمالک تطش عثرات ..

یدرب العافیه اترجاک .. من اعثر تطیح اویاي کود اذنوب ..

من اعثر تفوح اسرار وأُتعلگ نجم مفضوح..

یدرب العافیه اوجوه الخلایگ گاع مشتوله چثیره احلوگ..

چثیره احلوگ..

وانه ابطرگ البلم واللیل و بصدري جرف مخنوگ..

سید حسن الشریفي


 سيد حسن الشريفي
 

شارع اذنوب

جدايل صوتک وگذلة حچي الينگط ضوا اعلی الروح..

وغابات لجفون النایمه ابجرفين کحلة لیل ...

وطفلة ثغرک التتمرجح اعلی اشفاک چنها اهلال..

ومنارة طولک الأذن شذاها الحرمل وطشها بنده(ی) الموال ..

ونهر عطرک الفاض ابديرة القمصان واحتل کل زوایه الدار..

والحنه العفتها ابحسرة اچفوفک تعيش ابنار..

هذن کلهن یجني ابطيف من اشتاگ..

ثلج روحي یذوب ابصیف من اشتاگ..

اغییم وامطر ابصفنات لیلي انجوم من اشتاگ..

اشلون امسح اثر ممشاک من شارع اذنوب البال..!!

انه ابروحی حچي اولایات ما ینگال ..

غرّگني ابنهر صوتک واخذني الآخر الشلّال...

اخذني الاخر امرایه کسرها الروج واتطشر وجها وضاع بین ارمال ...

انه ابروحی حچي اولایات ما ینگال ..

سید حسن الشریفي


 سيد حسن الشريفي

انداوة نجم

ظلـــــمه روحي وغیــــم نجماتک بعید

 وجرف لیـــلي ابعازة انــــداوة نجـــــم ..

 الشـــــاربه اعیونه عطش یدرک هواي

یفـــهم الملـــــــچوم بــــس المنلــــچـــم

بیه دیره اتناطرک متروســـــــه طیب

وروح خضره وشــــــاعر ولیل و حلم

ومستحی وشوگ وعشگ واشویه خوف

ودفتري وقلمـــي وجرح بس یبتــســــم

مرن اوجوه اشــــــکثر مابیـــها روح

مالگیت البیها من وجهک رســـــــــم

دوریتک زعفرانه ابروض شــــــوگ

وماردت حتـــــی الهوا منک یشـــــم

ابکعبة اعیوني الدمــــع طاف ابخشوع

وبحــــجر شـــــوگي غیابک ینرجــــم

الرتّلو مصحف اجروحــــــي خبـــروک!

آیة الفرگه علی اشــفافي وســــــم ؟

مر علي بلقیس حتی اعذر جفــــاک

حتی ابنیـــلک عرش واعلن ســــــلم

طشریت ازهار بســـــتاني و مشيت

لیش خلیــــــت الحزن بیهن یلـــــم؟

سید حسن الشریفی


 سيد حسن الشريفي




انته اتفوح بيّه وانفضح نعناع

-------
تمطرني سمه الفرگه واطيحن حضن للملگه ...

الک ظلّي گبل لا انوي الخطوه رسملي اعله الدرب زلگه..

چثيره اعيون شربتّک شمس واتجازت ابشرگه..

اخاف امشيک والمعضد یبوح احرورة الشبگه..

بعدهي اعيوني ما ضاگن ضوه اعیونک ولا طيفي نسل طيفک.

أنثر حنطة اسنيني واگلک لگّط ابکيفک..

شتاي امکسر اجناحه ويدوّر مرهمه ابصيفک..

أضم اسمک وانزّل کل ستاير کوخ الحچايات ...

ياخذني الهوا ابجنحه سوالف شوگ..

وانته اتفوح بيه وانفضح نعناع ...

واضييّع عطرک ابعطري..

ما ادري لگوک اشلون واشتمّو زلف شبگة هواک امعلگ ابصدري..

سید حسن الشریفی

 


 سيد حسن الشريفي

تعال انكت ملح زلفي

...

تانیتک تمر دنية صفنتي اهلال,,

زارعلک عطش نهران متروسه سوالف صیف ,,

لملمني گبل لا تکثر اذنوبي وتغطیني عباة الشيب..

ترا القمصان مليانه خطايه وعيب...

تعال انکت ملح زلفي واخذني ابگاعک الخضره,,

تعال أشتل شلب فرگاک بین اضلوعك السمره,,

ولو مرني نده(ی) العشرین واتبلل ورگ عمري ودفاترنه ملاها الماي..

ولو فحطن قوافل صبري من السير و بجرحی حده الحداي..

ولو بیه عرس مذبوح ,,والفرحه غشیمة راي...

.ولو سفاني ما یندل مسیره امنین ,,یتأمل منارة راگ حاضنها ومیض اسراي..

ولو ثوب الخریف افصال بي کاشخ ربیع اصباي..

ولو کل ساعه اصیرن شمعة امعرسین لبسوني گلاید نار...

کل هذا و اگلک صار,,

ابمزار اعیونک اظنوني تعیش اصغار,

وبروحي تعیش انته صنم آذار,,

كل هذا واگلک صار ..

محتاجک تلم بيه بگایه انسان ..

تانیتک تمر دنية صفنتي اهلال,,

زارعلک عطش نهران...


سید حسن الشریفی


 سيد حسن الشريفي



جنح النده

علی اشـــفاف الورد جنح النده مکسور

من مرّت نسمتک ضمدت له اجناح 

تفز  حتـــــی المگابر من یمر طاريک

وحتی الجامدات اتصیر بیهــــا ارواح

علی اشفافک الخمره اتمرجحت للشوگ

بس محّد وصلها وطــــال چــــــفه و لاح

وجهک من عبر طشت ضواها انجوم

وانبــاگ الحـــسن مـــن وردة القّــــدّاح

یـــا ریــح الگرنفل لا تــمر اهـــــواي

ترا روحــــي رقیقه و عطر خدک فاح

ترا بعیني ســـــوالف خمّرتها اســـنین

اخاف اســــکبها یمک والخجل ینزاح

بعثرة درب حسـنک گلبي ذبه الشوگ

وگبل لا یحوي منک عثر بیک وطاح

عســاها ابخت وجهک من عبر للیوم

لا راحه وبنهاری ولا بلیلــــی ارتاح

بعینی المســتحه چانت عفیفه اهوای

واشــــعارالمغازل لابســـــات اوشاح

وهسـه اغصاني کلها امدلیات اشواگ

واعیوني اعلی دربک یا ملیح اوکاح

....

سید حسن الشریفی

 

 


 سيد حسن الشريفي

شایل اعله اچتافی ریل

.....

اعمر ابوجهي واريد ازرع البسمه وما تخضّر.

الصبخه فرشت فوگ خدي وگعدت اتطشر ملح کل ذکریاتي.

وين ادوّر يا مدينه اتضم عبرتي..؟

یا مدینه اوجوه اهلها اتواسي الالمي وتكض الريح لا يطفي شمعتي.؟

و يا مدينه البيها الله ايعيش وحده و ما اطش بيها دمعتي؟

و يا بساتين اللي تقبل تاخذ اشواكي وتلبّسني عطرها ؟..

ارد اشم ريحة حياة ونسمه عدله.. 

الروح ملّت من عطر ظلمة گبرها..

يا ضمير اشكثر ماعندك ضمير ..

گوه اتوچه اعله عکازة خلگ..

تیهتني و طبگتني اوراق مضمومه بدفاتر ..

وتيّهت بيه حسن شايل مشاوير ومشاعر.

حسن شال بصدره ناس وخوف و اجروح ودمار .. 

وشال بین انفاسه صحره .. 

صحره تحلم بالخضار..

خانگته احبال صفناته و تنانير الحمت بضلوعه نار..

يا ضمير اشبيك تنکتني وتطشّر خرز عمري..

انته تدري ابسور دیرتنه الحزینه اشکثر عالي.. 

وما انوش.

ما انوش الشمس حتی اکتل الظلمه العاجده ابأشعاري لیل .

هاي مده امضیّع ادروبي وادوّر عالقطار وشايل اعله اچتافي ريل.

ذنب مرسوم اعله طولي وماكو رهبان اليمد ايده اعله راسي ويمسح اذنوب الشعر.

گصرة اثیاب الخطایه العایشه ابموطن خيالي.. منین اجیب اقماش واسترها ابعذر ..

.ماكو غيم ايطهر ازهاري وينظّف ثوب روحي الصار اسود.

گوه امد شوفي اعله روحي وما اشوف..

ما شفت روحي ولا بمرايتي ايبين لي احّد..

سيد حسن الشريفي

 سيد حسن الشريفي




شوگ الکحل

مشتاگ الکحل والرمش دربــــه ابعيد

وثلثیــــن الحـــچي مدفون بالمــــــرود

یل باني خیـــالي قـــــــصر بمرایـــــات

ارحمني تراهو الحــــــجر بيّـــــه اصتد

مهتوكة شــــــرف دمعة ليالي اجفــاك

عافت عینـــــــها و نامت بحضن الخد

زنجــــــر باب صبري وعسّـــــر المفتاح

و انعاب الگفل مابیــــــن حل وســــــد

متخربص صـرت باول لـقاء بطـــــيف 

وگام احســاســــــي عالمضمون یتمرد

ذاني اتشــــــوف صوتک لو یمر عالبال

وتسمع همس شوگک عیني من تستد

حدر اهروش گلبي الشوگ يشــــعل نار

و ایطشــها بســـــواد العین من تشتد

مر مـرّة گمر نهر العشـــــــگ هلـــکان 

مِد وجهــک علي محتــــــاج منـــک مَد

مر بیه نده(ی) ایرطب حنیـن اشــــفاي

مـن یــوم العفتنــــي الضحک مــــا ورّد

تعال النجـم غافی ابحضن غیم اشتای

جیب اویــــاک گیضک حتـــی لا نبـــرد

ابعبات اللیل ربک ســــــاتر العشّـــاگ

ویعمیها الشــــوارع بعد ماتشهد تشــــــهد

سيد حسن الشریفی

 


 سيد حسن الشريفي

مشتاگین


انه ومستحاي وخاطری المکسور..

والدمعه العفیفه العایشه ابذکراک...

ودینه الشعر ینطر امل ملگاک...

شایل صوتنه المبحوح... شایل فوگ متنه اجروح ...

شایل ذکریات اتصیح مشتاگین... مشتاگین...

ودینه ابطریج الشوگ نسمه البارده اتوعی زلف نعسان شايل من صدرنه اذنوب.. ..

ودینه تطش نعناع فوگ اثیاب سكرانات من شبگة حلم محبوب..

يا ولیفي تعال انريد نذنب من بعدها انتوب....

يا ولیفي صبحنه انباگ ,ورگات الامل ماخذها چف الروج ,خوره اتدور بیها وضاع وجه الراگ ...

طریج المستحه عثرات واحنه اچتافنه امحمله شلیف اشواگ ..

تعذرنه لون نشتاگ..

دوانه اسنین خلص والجروح اغماگ ..

مربينه ولو شهگه ابصدر متروس ...

خضّرنه شجر عبرات. یولیفی المدامع فوس ...

یولیفی الکحل مشتاگ مر بینه رمش معشوگ..

مربینه ولو رحّال...

یولیفی الصحاری اتموت لو ما تمشی بیها النوگ ..

مشتاگین... حگنه انموت بین الشبگه والتابوت ..

حگنه انموت واحنه اول عشگ منعوت ..

حگنه انموت واحنه اول محطة ریل تتنطر قطار ایفوت ...

مشتاگین..

مای اوجه عدنه انخاف لا ینباع ..

مشتاگین ..بینه اللهفه تمشی اسنین ..

شوگ المای من یحضن سمار الگاع ..

شوگ الریح من یتشابگ اویشراع ..

مشتاگین .. مشتاگین .


.
سید حسن الشریفی


 سيد حسن الشريفي
 

 

گلبک وطن

انته یالگلبک وطن لملم عصافیر المحنّه...

اعیونک امرایات عمري البیها شفت اللیل واعي و یرسم برمشیک جنه ..

ابدرب وجناتک تهب من الذوایب زعفران وریح هیل وعطر حنّه..

انه اول من رسمتک غیم وابروحي صحاري اتريد ماي ...

وانه اول من رسمتک ليل متناثر نجم يحضن سماي..

وانه اول ريّه تشتم من عبيرک طیب واتعاند هواي..

لا تخلينی اعله درب الشوگ واگف ..

بیدی خاطر منکسر واسنین تنزف ..

ولا تعلمني اعله بعدک ..

 انه ناي الونّه کاتل مستحاتی اشما اذکرک بيّه يعزف..

اوجوه الیکرهون اجتني وکاشخه بحضکة شماته...

لا تخلّي اعيوني ترفع ثوبها  وينهد سترها ...

لا تخلي اشجاري يتفرهد  ثمرها ...

ولا تعودني اعله ليله انباگ من عدها فجرها..

انته یالگلبک وطن ما عوّدت روحي ابغیابک..

اشلون اعوّد روحي تلها انه لیليه انتظر مطرة سحابک...

...

سيد حسن الشريفي

 

 


 سيد حسن الشريفي

 

 

 

جرح فرگاک

جرح فرگاک بعده بروحي مچوم

چذب من گال جرحی اتطیبه الایام

طفل الفاگد اهله اشـــــلون یرتاح

وانه ابصدری طوایف من الایتام

اگضّي اللیل مثل الچــــفه ملدوغ

اهوي وبيّـــه مثـــلي اتوي الالام

عفيه اعيون عندي امسامره الليل

ما تلبــــــس جفنها وتقبـــل اتنام

تجرحـــني البــــلابل والعصـــافير

علی اشــجار الــوداع وتنثر انغام

اصـوم من الفرح واتلیـلک ادموع

سبع اســنین وانه اشـــفای صيّــام

خذاني الروج وآنه ابطرگ الانفاس

انزع یـــا نفس حتی ابـــگه عوّام

من کــــل ثانـيات العمـــر مجزوع

ثواني ايمر مشيهن چــن الف عام

ســواد اعيوني شاب ابليل فرگاک

وفتح حزنه الشــــعر والخير جدّام

لا تهتــــم بــعد محبوبک ابخـــير

بعده ايعیــش بین ادروب الاوهام

وبعده ایناطرک من یجبــــل اللیل

عساک اتمر حلم مابـــین الاحلام

***

سید حسن الشریفی

 


 سيد حسن الشريفي
یمکنکم تحمیل قصیدة

غابة الهجران



 سيد حسن الشريفي


بفراگک شـــبیـــه النــــاي     لحناي

يمن بس سهم گوس اجفاک    لحناي

عليک ابکل طلوع الفـــجر    لحناي

اچفوفي ابدم دليلي النزف بيه

***

بفراگک شــــــبيه الناي       وناي

اون والناس کلها اتگول     ون ناي

انته اللي نســـيت العهد     و إني

بعدني اعله الدرب وانتظر جيه

***

لا لي افـــراح عگبــک      بسمه لا لي

وزمانـــي الکـــاس بلهم     بس ملالي

غدت بعدک ابروحــي      بس ملالي

الگلب چن کربله وينعون بيه

***

علامک کاس روحـــــي ابقهر    ملّيت

اجزعت لو من حبيبک غصب    ملّيت

الــــراد افـــــراگنه ونبتـــعد    من ليت

دعاوي اشواگنه اتوسده المنيه

***

اشيرد گلبي علی المحبوب    من طار

الرحــل خله اشيفيده الليــل     منطار

عفتني احساب حایط بيـــت     منطار

بغیابک عشعش الخفاش بيه

***

يولفي اشبيک وصلک       ما تتماه

مثل آهــي بــــودادک        ما تتم آه

اترکتني احساب ياهل      ماتت امه

اون ابوجه کلمن نظر ليّه

***

اون والناس کلمــن حـــار     بلما

وليلي مبحر اعله الضــيم     بلما

اترکتني احساب عايب طاح   بلما

ظلام وبحر والحيتان ميّه

***

يوج روحـــي واگلهم    ما يوجها

حبيبي وســـهم هجره    ما يوجها

انه اشمدريني يخرص  ماي وجها

ويبدّل ليرتي بفحمه رديه

***

سید حسن الشریفي

 
 


 سيد حسن الشريفي

سید حسن الشریفی

یریحة عنبر وشـــــــــمّام        یا هیل

رحت واهلال شهر الضیم         یا هل

عفتنــی چــن حــــمامه بید         یاهل

ایتسلّه اشما یهلّس ریش بیه

 

سید حسن الشریفی


 سيد حسن الشريفي