X
تبلیغات
الشعر الشعبي _ سید حسن الشریفي

شایل اعله اچتافی ریل

.....

اعمر ابوجهي واريد ازرع البسمه وما تخضّر.

الصبخه فرشت فوگ خدي وگعدت اتطشر ملح کل ذکریاتي.

وين ادوّر يا مدينه اتضم عبرتي..؟

یا مدینه اوجوه اهلها اتواسي الالمي وتكض الريح لا يطفي شمعتي.؟

و يا مدينه البيها الله ايعيش وحده و ما اطش بيها دمعتي؟

و يا بساتين اللي تقبل تاخذ اشواكي وتلبّسني عطرها ؟..

ارد اشم ريحة حياة ونسمه عدله.. 

الروح ملّت من عطر ظلمة گبرها..

يا ضمير اشكثر ماعندك ضمير ..

گوه اتوچه اعله عکازة خلگ..

تیهتني و طبگتني اوراق مضمومه بدفاتر ..

وتيّهت بيه حسن شايل مشاوير ومشاعر.

حسن شال بصدره ناس وخوف و اجروح ودمار .. 

وشال بین انفاسه صحره .. 

صحره تحلم بالخضار..

خانگته احبال صفناته و تنانير الحمت بضلوعه نار..

يا ضمير اشبيك تنکتني وتطشّر خرز عمري..

انته تدري ابسور دیرتنه الحزینه اشکثر عالي.. 

وما انوش.

ما انوش الشمس حتی اکتل الظلمه العاجده ابأشعاري لیل .

هاي مده امضیّع ادروبي وادوّر عالقطار وشايل اعله اچتافي ريل.

ذنب مرسوم اعله طولي وماكو رهبان اليمد ايده اعله راسي ويمسح اذنوب الشعر.

گصرة اثیاب الخطایه العایشه ابموطن خيالي.. منین اجیب اقماش واسترها ابعذر ..

.ماكو غيم ايطهر ازهاري وينظّف ثوب روحي الصار اسود.

گوه امد شوفي اعله روحي وما اشوف..

ما شفت روحي ولا بمرايتي ايبين لي احّد..

سيد حسن الشريفي

 سيد حسن الشريفي




شوگ الکحل

مشتاگ الکحل والرمش دربــــه ابعيد

وثلثیــــن الحـــچي مدفون بالمــــــرود

یل باني خیـــالي قـــــــصر بمرایـــــات

ارحمني تراهو الحــــــجر بيّـــــه اصتد

مهتوكة شــــــرف دمعة ليالي اجفــاك

عافت عینـــــــها و نامت بحضن الخد

زنجــــــر باب صبري وعسّـــــر المفتاح

و انعاب الگفل مابیــــــن حل وســــــد

متخربص صـرت باول لـقاء بطـــــيف 

وگام احســاســــــي عالمضمون یتمرد

ذاني اتشــــــوف صوتک لو یمر عالبال

وتسمع همس شوگک عیني من تستد

حدر اهروش گلبي الشوگ يشــــعل نار

و ایطشــها بســـــواد العین من تشتد

مر مـرّة گمر نهر العشـــــــگ هلـــکان 

مِد وجهــک علي محتــــــاج منـــک مَد

مر بیه نده(ی) ایرطب حنیـن اشــــفاي

مـن یــوم العفتنــــي الضحک مــــا ورّد

تعال النجـم غافی ابحضن غیم اشتای

جیب اویــــاک گیضک حتـــی لا نبـــرد

ابعبات اللیل ربک ســــــاتر العشّـــاگ

ویعمیها الشــــوارع مابعد تشــــــهد

سيد حسن الشریفی

 


 سيد حسن الشريفي

مشتاگین


انه ومستحاي وخاطری المکسور..

والدمعه العفیفه العایشه ابذکراک...

ودینه الشعر ینطر امل ملگاک...

شایل صوتنه المبحوح... شایل فوگ متنه اجروح ...

شایل ذکریات اتصیح مشتاگین... مشتاگین...

ودینه ابطریج الشوگ نسمه البارده اتوعی زلف نعسان شايل من صدرنه اذنوب.. ..

ودینه تطش نعناع فوگ اثیاب سكرانات من شبگة حلم محبوب..

يا ولیفي تعال انريد نذنب من بعدها انتوب....

يا ولیفي صبحنه انباگ ,ورگات الامل ماخذها چف الروج ,خوره اتدور بیها وضاع وجه الراگ ...

طریج المستحه عثرات واحنه اچتافنه امحمله شلیف اشواگ ..

تعذرنه لون نشتاگ..

دوانه اسنین خلص والجروح اغماگ ..

مربينه ولو شهگه ابصدر متروس ...

خضّرنه شجر عبرات. یولیفی المدامع فوس ...

یولیفی الکحل مشتاگ مر بینه رمش معشوگ..

مربینه ولو رحّال...

یولیفی الصحاری اتموت لو ما تمشی بیها النوگ ..

مشتاگین... حگنه انموت بین الشبگه والتابوت ..

حگنه انموت واحنه اول عشگ منعوت ..

حگنه انموت واحنه اول محطة ریل تتنطر قطار ایفوت ...

مشتاگین..

مای اوجه عدنه انخاف لا ینباع ..

مشتاگین ..بینه اللهفه تمشی اسنین ..

شوگ المای من یحضن سمار الگاع ..

شوگ الریح من یتشابگ اویشراع ..

مشتاگین .. مشتاگین .


.
سید حسن الشریفی


 سيد حسن الشريفي
 

 

گلبک وطن

انته یالگلبک وطن لملم عصافیر المحنّه...

اعیونک امرایات عمري البیها شفت اللیل واعي و یرسم برمشیک جنه ..

ابدرب وجناتک تهب من الذوایب زعفران وریح هیل وعطر حنّه..

انه اول من رسمتک غیم وابروحي صحاري اتريد ماي ...

وانه اول من رسمتک ليل متناثر نجم يحضن سماي..

وانه اول ريّه تشتم من عبيرک طیب واتعاند هواي..

لا تخلينی اعله درب الشوگ واگف ..

بیدی خاطر منکسر واسنین تنزف ..

ولا تعلمني اعله بعدک ..

 انه ناي الونّه کاتل مستحاتی اشما اذکرک بيّه يعزف..

اوجوه الیکرهون اجتني وکاشخه بحضکة شماته...

لا تخلّي اعيوني ترفع ثوبها  وينهد سترها ...

لا تخلي اشجاري يتفرهد  ثمرها ...

ولا تعودني اعله ليله انباگ من عدها فجرها..

انته یالگلبک وطن ما عوّدت روحي ابغیابک..

اشلون اعوّد روحي تلها انه لیليه انتظر مطرة سحابک...

...

سيد حسن الشريفي

 

 


 سيد حسن الشريفي

 

 

 

جرح فرگاک

جرح فرگاک بعده بروحي مچوم

چذب من گال جرحی اتطیبه الایام

طفل الفاگد اهله اشـــــلون یرتاح

وانه ابصدری طوایف من الایتام

اگضّي اللیل مثل الچــــفه ملدوغ

اهوي وبيّـــه مثـــلي اتوي الالام

عفيه اعيون عندي امسامره الليل

ما تلبــــــس جفنها وتقبـــل اتنام

تجرحـــني البــــلابل والعصـــافير

علی اشــجار الــوداع وتنثر انغام

اصـوم من الفرح واتلیـلک ادموع

سبع اســنین وانه اشـــفای صيّــام

خذاني الروج وآنه ابطرگ الانفاس

انزع یـــا نفس حتی ابـــگه عوّام

من کــــل ثانـيات العمـــر مجزوع

ثواني ايمر مشيهن چــن الف عام

ســواد اعيوني شاب ابليل فرگاک

وفتح حزنه الشــــعر والخير جدّام

لا تهتــــم بــعد محبوبک ابخـــير

بعده ايعیــش بین ادروب الاوهام

وبعده ایناطرک من یجبــــل اللیل

عساک اتمر حلم مابـــین الاحلام

***

سید حسن الشریفی

 


 سيد حسن الشريفي
یمکنکم تحمیل قصیدة

غابة الهجران



 سيد حسن الشريفي


بفراگک شـــبیـــه النــــاي     لحناي

يمن بس سهم گوس اجفاک    لحناي

عليک ابکل طلوع الفـــجر    لحناي

اچفوفي ابدم دليلي النزف بيه

***

بفراگک شــــــبيه الناي       وناي

اون والناس کلها اتگول     ون ناي

انته اللي نســـيت العهد     و إني

بعدني اعله الدرب وانتظر جيه

***

لا لي افـــراح عگبــک      بسمه لا لي

وزمانـــي الکـــاس بلهم     بس ملالي

غدت بعدک ابروحــي      بس ملالي

الگلب چن کربله وينعون بيه

***

علامک کاس روحـــــي ابقهر    ملّيت

اجزعت لو من حبيبک غصب    ملّيت

الــــراد افـــــراگنه ونبتـــعد    من ليت

دعاوي اشواگنه اتوسده المنيه

***

اشيرد گلبي علی المحبوب    من طار

الرحــل خله اشيفيده الليــل     منطار

عفتني احساب حایط بيـــت     منطار

بغیابک عشعش الخفاش بيه

***

يولفي اشبيک وصلک       ما تتماه

مثل آهــي بــــودادک        ما تتم آه

اترکتني احساب ياهل      ماتت امه

اون ابوجه کلمن نظر ليّه

***

اون والناس کلمــن حـــار     بلما

وليلي مبحر اعله الضــيم     بلما

اترکتني احساب عايب طاح   بلما

ظلام وبحر والحيتان ميّه

***

يوج روحـــي واگلهم    ما يوجها

حبيبي وســـهم هجره    ما يوجها

انه اشمدريني يخرص  ماي وجها

ويبدّل ليرتي بفحمه رديه

***

سید حسن الشریفي

 
 


 سيد حسن الشريفي

سید حسن الشریفی

یریحة عنبر وشـــــــــمّام        یا هیل

رحت واهلال شهر الضیم         یا هل

عفتنــی چــن حــــمامه بید         یاهل

ایتسلّه اشما یهلّس ریش بیه

 

سید حسن الشریفی


 سيد حسن الشريفي

لون الضباب

لبس شارعنه القدیم اثیاب جدد ...

اثیاب من خام الضباب ..

والنسیم اتعطر بطین الشوارع ..

گام یمشی .. ویطرق ابواب المدینه باب باب ..

والمدارس رتّلو قرآن  بیها ...

وابتدا الیوم الجدید ابلون ابیض ..

والشمس نامت رغد باحضان غیمه ..

غیمه ما بیها مطر ..

غیمه مثلی اتسیر بدروب السفر ..

غیمه ضمّت کل سوالفها بحضن ذاک النهر ..

والنهر مات وذبح کل السوالف ..

یا حسن والسلف عارف ..

مادریت ابیا کتر الگالی صوت ..

صوتی ذابل .. حیل ذابل ..

صوتي بس لم الخفافیش العنیده وشرّد اسراب البلابل ..

یا حسن ضیجه المنازل ..

ابصدرک المنجل حصد کل السنابل ..

یا حسن ضیجه المنازل ..لیش تنده جرح غافي

جرح غافي النومیته ابصوت داخل ..

یا حسن لون الضباب ایکدّر اوجوه المشاعر ..

وانته شاعر ..شاعر وعندک وطن مخنوگ صوته ..

وطن عاش اسنینه لوعه واهله موته ..

 

سید حسن الشریفی

 


 سيد حسن الشريفي
 

 

الی روح کارون

 

شیّعناک..

الله اویانه چان ابّین المشیعین...

اعله تابوتک کتبنه اشعار مهضومات ..

ورتّلنه اعله طولک حمد والیاسین..

شيّعناک...

کل ما ننهض الوجه الصبح ونصیح  ..

تدمغنه عصاة الدین....

هواک العذري چان ایغازل العشّاگ.. وعلی ازلوفک قصاید غنّه بیها الغاگ...

مواویل اشکثر نامت ابحضن الراگ ...

چنه اویالحلم ننتظر عرسک عود..

ماردنه ثیاب السود ..

شیّعناک..

یا کعبة عشگنه الچنه بیک انطوف ...

معذوره الشمس تلبس علیک اکسوف...

شیّعناک...

یالمدفون بیک الحچی الماینگال..شفرَة موت تفتر بین الف موّال ..

یالمایک طهر یغسل اذنوب الگاع ...سفینتنه بغیابک کسّرت لشراع..

الله اویاک یالماشی بدون اوداع ..

الله اویاک ....بالجنه انتلاگه اهناک.....

سید حسن الشریفی

 


 سيد حسن الشريفي
 

 

یمکنکم تحمیل قصیدة

یتامه ادموع عیني


 سيد حسن الشريفي

 

یمکنکم تحمیل قصیدة

جاي ترسم يا نهر؟

 

 


 سيد حسن الشريفي
 

 

غابة الهجران

من توادعنه الصـــــبر کض بیــده فاس

وگام یگطع کــــــل شجر روض العمــــر

وصـــار درب الفرگه چن درب الصـراط

ویا هو یگدر من علــــــی الــفرگه یمر

من رحت مات الصبــــح ظل عندي لیل

لیل هندس بي شــــفت نجم الظــــــهر

الجروح اثیاب لبســـــــــن من جديــــد

ولاگـــــن اعلیهن فســــــاتین الحــــمر

استحي من اجروحي واغرگ بلـحیاء

للجروح الماشــــــــــفن شــاخلق عذر

ویـن ادورک! یا سـلف اســأل علیک؟

بیا قصاید الــــگه وجهــک یا کتـــــــر؟

ماي البوجـــهي خلص من گد بـــچاي

جربة اعیـــوني بغیابک بـــــــس تخـر.

اســرار حبک چانت بعينـــــي تعیــش

حدر رمش العیــن متغطیه بســـــــتر

ليش خليت الدمـع يفضــــح هــــواي؟

ومن بنات اســــــراري ينبـاگ الخدر؟!

غابة الهجران وحشـــــــــه ابلا امان

وروحي ظبيــه وساعة افراگــک نــمر

رد ولو لحظة امشـــــــابگ لـلــوداع،

ریتي عطشـــــانه النســـیمک یاعطر

یم ضریح الشـــــــوگ بانیلک مــقام

وگلبي شــــدّیته اعله شــــباچک نذر

طفل گلبی الهســــــه یدعیلک تــعود

جالـــــــس بحضرة مقامک  ینتــــظر

****

سید حسن الشريفي


 سيد حسن الشريفي

ایا مـــن کالثـریه ایبـــان     محیاک

تظن لیلی بوناسه احیاک    محیاک

کتبتک بالعگل واشلون     محیاک

من ارید امحیک امحي العگل بیه

سيدحسن الشريفي

 

ايــا من كالثريه ايـــبان      وجهاك

اخذ گلبي بلهب ملگاک     وج هاك

يمسرع بلمشي لاويـن       وجهاك!

جهنم من مشیتک ســــرت بیه

سيدحسن الشريفي

 

ايــا من كالثــريه ايبــان     بشراك

عليمن درت گلب اهواك    بشراك

ترك حيلي وتگلي الحيل    بشراك؟

ولا چن سگم هجرک حاط بیه!

سيدحسن الشريفي

 

ایــا من کالثریــه ایبــان      وصفاك

ربك سلســـــــبيل اهداك      وصفاك

اناطر يمته كون الگاک      وصفاك

وتظل محبس عرس يلمع بديه

سيدحسن الشريفي

 

ايامن شع ومیض الحسن       بدراك

تبعتك مو جهل يــهواي        بدراك

تدري ابحالتي وما تهم         بدراك

مدرچ مایفید اعلاج بیه!

سيدحسن الشريفي

 

ایامن شع حســــــن ملگاک     من جا

الیطیح ابشط هواک اشلون     منجا؟

عمر ناجه الگلب واجهلت      منجا

لحد ما نزل وحي الموت بيه

سيد حسن الشريفي

 

اهنا یلی گطعت الوصـــــل       لحما

حمیت امواصــــــلک مافاد      لحما

وحقک جسمی ذاب اعلیک     لحما

عظم خاوی ویگود الموت بیه

سيد حسن الشريفي

 

اهنا یلی اگطعت بجفاک     وصلاک

گلبـک یا ولف لاویــــن     وصلاک

لو مثلی شواک الهـــجر    وصلاک

تحس برزخ عذابی اليجري بيه

سيد حسن الشريفي

 

اهنا يلّـــــي تلف العجب    برداك

چنت تسعر علیش البعد   برداك

مایکفی لعنــــد العظم    برداک!!

یمبرد ناوي تبرد يانويه؟

سيد حسن الشريفي

 

تجـــــافي وما گلت للــناس    جفناي

يمن بجفاك عاف الوســـــن    جفناي

صرت شجره وسموم الهجر   جفناي

تلاحگ لا تشب نیران بیه

سیدحسن الشریفی

 

من عگله انسلب بجفاک    من حار؟!

رایه ومـــا یمیــــیز برد     من حر

حبیبی ابفرگک گصیت       منحر

حیاتی وکل شبابی انذبح بیه

سید حسن الشریفی

 

یروحی اگبال ذاک الولف      عنداي

واحذرچ بیه لا تحچــــین     عن داي

الذنب مو بلمحب یاروح       عندي

مشیت بشور گلبی وعم علیه

سيد حسن الشريفي

 

افراگ اهل الوفه والحب    شتانی

ابصیف وگلبی من حزنه   شتانی

یگلی اعله الدرب تانــی   شتانی؟

عمر تانیت مارد ولف لیه

سیدحسن الشریفی

 

اسهامک بیّه من مرماک    لاحن

طحت واللی یحن بجفاک    لاحن

عسه وکت الفراگ اویاک   لاحان

ذبح ریع الشباب وفتک بیه

سيد حسن الشريفي

 

الا یعیون ضییــــعتن      عرفچن؟

عمیتن والولف ماظن      عرفچن

عند اهل العشگ اذکر  عرف چان

تبدل والأعراف انمحت هیه

سيد حسن الشريفي

 

غار ابعشمت الجـــــافين    وجفاي

حبيبي ونار وسط احشاي   وجفاي

بعدني بدرب اليحبـــون     وجفاي

انطر ياعساه ايعود ليه

سيد حسن الشريفي

 

 الوعد ياروح احـــذرچ     لا تخلفين

و إجدمي ابسير صبرچ     لا تخلفين

يروحــي اجــروح جدد     لا تخلفين

إذا اموتن يتامه اتصير هيه

سید حسن الشریفی

 

 


 سيد حسن الشريفي

سید حسن الشریفی

 

ديرة الفقره

بدیرة الفقره سوالف بایته بحلگ الرصیف..

بديرة الفقره جرح شايل قصايد..

جرح لابسله قميص من النزيف..

ديرة الفقره انعدم بيها الربيع..

وكلشي اصبح لونه اصفر..

حتی سالوفت عشگنه اثیابها اتبدل خریف...

ما لگینه الکحل لعیون القصیده..

الهسه رمده ومایفارگها الرفیف..

آه یا دیرة فقرنا اشگد نحن لعجودچ الملیانه شوگ..

آه من عثرات شارعنه الدفنه ابطینه کل الذکریاة...

آه من حوبة ملح خبزات اُمنا ..

 چنه من انبوگ چلمه انخاف نحلف بالرغیف..

آه من ذیچ اللیالی السامرتنه وساهرتنه..

چنه نلبد بلعجود ونشرد بگاع الطفوله.. ،

چنه اکبر من عمرنه.. اهوای اکبر..

بینه لون من الرجوله..

 آه یا اُمنا الخجوله..

اُمنا یاشیخة نساء الکبریاء. .

اُمنا ماعدها ریاء..

شمعه ضوّاها الصبر دین وحیاء...

 من یمر طاري الضحک بشافنه اتشوف السوالف تنکسر مثل الشجر..

واُمنا فوگ اخدوها ایسیل النهر...

.چانت اتغطي المصایب و الجروح ..

ای یبستان الطفوله اشگد تفوح ..

بحایط الأفکار ذکری وما تروح .

باقیه اتسولف جرح ینزف حنین ..

باقیه اتسولف عشگ ذیچ السنین..

آه من ذیچ السنین . آه من ذيچ السنین...

ومرّت الأیام رمشه ..اشگد سریع العمر عده ..

رد یعمری .. رد يعمري

احلامی مزروعه ابحضن ذیچ المخده .

رد علی ساعه واخذ منی صفنتی..

خنجر الصفنه ذبح طفلة ضحکتی..

مر على اتراب الشفايف غيمه سوده..

اعیونی ترفه وحیل ذبّلها السهر..

انا محتاجك مطر...

انا محتاجك گبل لا انتهی ابدرب السفر..

سيد حسن الشريفي


 سيد حسن الشريفي